Metro Radio

陳少寶有意阻撓李克勤出席葉蒨文音樂會

作晚，新城娛樂台主辦的葉蒨文真我在舞台音樂會，在一片歡呼聲中圓滿結束，雖然大家都覺得沙麗表現好出色，但佢只俾自己八十分，反而俾其他嘉賓一百分，認為李克勤、趙頌茹、ＥＯ２、Ｅ－ｋｉｄｓ一班嘉賓表現出色，掀起成晚既高潮，基於反應熱烈，沙麗透露準備明年九月正式再開演唱會，不過入完紙之後，佢又覺得好緊張，所以暫時尚在考慮當中

演出完後，嘉賓之一李克勤自爆環球高層陳少寶有意力阻出席沙麗的音樂會，原因係陳少寶認為克勤同沙麗屬於兩間唔同唱片公司，克勤唔應該為其他公司既歌手打氣，沙麗聽到呢個消息，表現得難以置信，沙麗話，如果想樂壇有進步，歌手與歌手之間擦出火花，做出好騷俾觀眾睇，就唔應該存在呢類門戶之見，沙麗認為歌手之間既友情，遠遠重要過玩呢類政治把戲！

Metro Radio

趙頌茹為葉蒨文徹夜失眠

葉蒨文真我在舞台音樂會上面，師妹趙頌茹擔任其中一位表演嘉賓，第一次見大場面，阿Ｙｕ由上台驚到落台，表演前一晚更加睡唔著，演出當晚，阿Ｙｕ又唔俾媽咪黎睇騷，怕自己會愈睇愈緊張，究其原因，阿Ｙｕ話因為第一次響咁大既場地演出，加上又第一次公開跳舞，仲要唱首難度極高既《談情說愛》，緊張到阿Ｙｕ腳震震，好彩最後都能夠順利完成，阿Ｙｕ分數五至六十分，算係剛剛合格！

沙麗要求一向嚴格，但阿Ｙｕ強調沙麗並冇鬧過佢，反而沙麗讚過佢夠勤力，阿Ｙｕ覺得勤力係應份既，因為人地俾機會自己唱歌跳舞，唔好好把握，即係對自己唔住！

Metro Radio

李克勤舞台重遇葉蒨文如見舊朋友

葉蒨文真我在舞台音樂會，請黎李克勤做特別嘉賓，兩位巨星既第一次相遇，克勤仲記憶猶新，克勤記得十幾年前，沙麗帶佢去澳州登台，當時克勤仲係小朋友，沙麗帶佢周圍去玩，大家玩得好開心，克勤仲帶埋當年同沙麗一齊登台既珍貴相片上台懷緬一番，好有紀念價值！

咁多年冇響舞台同沙莉交手，克勤感覺就如重遇老朋友，佢大讚沙麗既歌聲令佢汗顏，希望沙麗可以唱多ｄ歌，唔好久唔久就同老公林子祥去打ｇｏｌｆ，收埋自己！